पोखरा । शुक्रबारबाट रिलिज भएको चलचित्र ङोल्स्यो रानि ले पोखरामा उत्कृष्ट व्यापार गरिरहेको छ। एकै साथ रिलिज भएका तीन चलचित्रमध्ये सिटामोल पोखराबाट बाहिरिए पनि ङोल्स्यो रानि निरन्तर दर्शक तान्न सफल भएको छ।
मल्टिप्लेक्स हलमा प्रदर्शनको मौका नपाए पनि यस चलचित्रले पोखराको तेर्सापट्टीस्थित श्रीकृष्ण चलचित्र हलमा मात्र रिलिज भई चौथो दिनसम्म हाउसफुल प्रदर्शन गरिरहेको छ। करिब ८०० सिट क्षमताको हल दैनिक भरिँदै जानु चलचित्रप्रति दर्शकको उच्च आकर्षणको संकेत मानिएको छ ।
बिश्राम फिल्म्स प्रा.लि. को ब्यानरमा निर्माण भएको फिल्म श्रावण २३, २४, २५ र २६ गते देखि पोखराको श्रीकृष्ण चलचित्र मन्दिरमा विशेष प्रदर्शन भईरहेको छ । चार दिन सम्म मात्रै चलाउने जमर्को गरेको “ङोल्स्यो रानी” शुरुमा एक शो मात्रै गरेको थियो भने अब दर्शकको माग अनुसार अझै सो थप्ने गरी निरन्तर चलिरहने फिल्मको निर्माता जिबन गुरुङले बताएको छ !
फिल्मका निर्माता जिवन गुरुङ हुन् भने निर्देशन कमल बहादुर गुरुङले गरेका छन् । ‘ङोल्स्यो’ गुरुङ भाषामा ‘सोल्टीनी’लाई जनाउने शब्द हो, जसले फिल्मको मूल कथा र भावनालाई झल्काउँछ ।
फिल्ममा मिरा गुरुङ, मनोज गुरुङ, आशिष गुरुङ, बिक्रम राणा, डिबी गुरुङ, टिकाराम घले, कुबिना गुरुङ, लाल शोभित गुरुङ, खिमकुमारी गुरुङ, अनाम गुरुङ, मोहन गुरुङ र टिना गुरुङ लगायत चर्चित कलाकारहरुको अभिनय रहेको छ । चर्चित अभिनेता तथा निर्देशक माओत्से गुरुङको विशेष अभिनय पनि फिल्ममा देख्न पाइनेछ । फिल्मका कार्यकारी निर्माता राजबहादुर गुरुङ, छायांकन तथा सम्पादन निकोलस गुरुङ, एक्सन निर्देशन राजु किरात, र गीतको कोरियोग्राफी पवित्रा गुरुङ तथा कमल बहादुर गुरुङले गरेका छन् ।
