काठमाडौं । रुपन्देहीस्थित कारागारमा १२६ दिन बिताएपछि राष्ट्रिय स्वतन्त्र पार्टी (रास्वपा) का सभापति रवि लामिछानेलाई आज ललितपुरको नख्खु कारागारमा सारिँदैछ। भैरहवाबाट काठमाडौं आउने क्रममा उनले पार्टीका नेताहरूसँग छोटकरी भेट गरेका छन्। गौतमबुद्ध अन्तर्राष्ट्रिय विमानस्थलमा उपसभापति स्वर्णिम वाग्ले र प्रवक्ता मनिष झाले उनलाई भेटे।
सो अवसरमा लामिछानेले रुपन्देही कारागारमा बिताएको समयको अनुभव सुनाउँदै आफू बसेको कोठाको भित्तामा केही शब्द लेखेर आएको खुलासा गरेका हुन्। ‘अब कृष्ण जन्मिने छैन, जन्मेकाहरूले नै कृष्ण बन्नुपर्नेछ,’ उनले लेखेको वाक्य प्रवक्ता झाले उद्धृत गर्दै सुनाए।
यस्तै, उनले राजनीतिक प्रतिशोधका कारण आफूलाई जता–जहाँ पठाए पनि डर नलाग्ने दाबी गरे। ‘राजनीतिक प्रतिशोधले मंगलग्रह लगे पनि डराउँदिन, यो मेरो देश हो, मेरो भूमि हो,’ भन्ने लामिछानेको भनाइ प्रवक्ता झाले सार्वजनिक गरेका छन्।
वाग्ले र झाले उनलाई कारागारमै भेट्न खोजे पनि अनुमति नपाएका थिए। तर विमानस्थलमा केही बेर भेट्ने अवसर पाएका थिए।लामिछाने आज भैरहवाबाट युए ८६० बुद्ध एयरको उडानमार्फत काठमाडौं आइपुगेका छन्।
