काठमाडौं । अस्ट्रेलियामा जारी टप एन्ड टी–२० सिरिजमा नेपालले लगातार दोस्रो जित हासिल गरेको छ । डार्विनको पार्मर्स्टनस्थित काजालिस एरेनामा बुधबार भएको खेलमा नेपालले मेलबर्न रेनेगेड्सलाई ३३ रनले हराएको हो । यसअघि मंगलबार भएको खेलमा नेपालले होबार्टविरुद्ध उत्कृष्ट प्रदर्शन गर्दै ६६ रनको फराकिलो जित हात पारेको थियो ।
तर, त्यसअघि भएका तीन खेलमा नेपाल पराजित भएको थियो । पहिलो खेलमा नेपाल एनटी स्ट्राइकसँग ४२ रनले, दोस्रो खेलमा बंगलादेश एसँग ३२ रनले र तेस्रो खेलमा मेलबर्न स्टार्ससँग ३१ रनले पराजित भएको थियो । आजको खेलमा नेपालले दिएको १४० रनको लक्ष्य पछ्याएको मेलबर्न अन्तिम बलमा अलआउट हुँदै १०६ रनमा समेटियो ।
मेलबर्नका लागि अर्जुन नायरले २६ रन बनाउनुबाहेक अन्य खेलाडीले उल्लेखनीय प्रदर्शन गर्न सकेनन् । नेपालका लागि सोमपाल कामीले पाँच विकेट लिए । कुशल भुर्तेलले दुई विकेट लिँदा रुपेश सिंह र शाहब आलमले एक-एक विकेट लिए ।
यसअघि टस जितेर ब्याटिङ थालेको नेपालले २० ओभरमा ९ विकेटको क्षतिमा १३९ रन बनाएको थियो । नेपालका लागि कुशल मल्लले २९ रन बनाउँदा कप्तान दीपेन्द्रसिंह ऐरीले २७ रन जोडे । लोकेश बमले १६ बलमा २४ रन बनाएर आउट भएका थिए ।
यससँगै नेपाल पाँच खेलमा तीन हार र दुई जित निकाल्दै ४ अंकसहित तालिकाको छैटौँ स्थानमा उक्लिएको छ । अब नेपालले शुक्रबार पाकिस्तान शाहिन्ससँग खेल्ने छ ।
