काठमाडौं । सामाजिक सञ्जालमा रोजगारीको विज्ञापन गरी ठगी गरेको आरोपमा २३ वर्षका मनम घर्तीलाई प्रहरीले समातेको छ। सुर्खेत भेरीगंगा नगरपालिका ३ घर भई हाल नागार्जुन नगरपालिका ४ रानीपाटी बस्ने घर्तीलाई पक्राउ गरी ठगी सम्बन्धी कसुरमा आवश्यक अनुसन्धान एवं कारवाहीको लागी मङ्गलबार जिल्ला प्रहरी परिसर, काठमाडौंमा पठाइएको प्रहरीले जनाएको छ।
उनले सामाजिक सञ्जाल फेसबुक, ह्वाट्सएप, इमोजस्ता एपहरूको दुरुपयोग गरी आकर्षक तलब, सुविधामा फ्रान्स, स्विट्जरल्याण्डजस्ता विकसित देशहरूमा रोजगारीको अवसर रहेको भनी विज्ञापन राख्ने गरेका थिए। त्यसरी सम्पर्कमा आएका व्यक्तिहरूलाई काठमाडौंं उपत्यकाका विभिन्न स्थानमा बोलाएर भेटी भिसा प्रोसेसिङका लागि उनीहरूको सक्कल कागजात मागी लिई बैङ्क खातामा समेत पैसा जम्मा गर्न लगाउने गरेको पाइएको प्रहरीले जनाएको छ।
घर्तीले उनीहरूकै नागरिकता तथा राहदानी समेतका कागजातहरूको प्रतिलिपि मोबाइल सेवा प्रदायक कम्पनीहरूमा पेस गरी मोबाइल नम्बर निकाली सिम डुब्लीकसन गर्ने गरेका थिए। उक्त सिम कार्डको माध्यमबाट पीडितहरूकै मोबाइल बैकिङमा पहुँच पुर्याएर रकम अन्यत्र ट्रान्सफर गरी ठगी गरेको पाएको प्रहरीको दाबी छ। यसरी आफूहरू पीडित भएको भन्दै प्रहरीमा परेको उजुरी दिएका आधारमा अनुसन्धान कार्य गर्दै जाँदा उक्त कार्यमा संलग्न घर्तीलाई प्रहरीले पक्राउ गरेको हो।
