काठमाडौं । सरकारले सञ्चार तथा सूचना प्रविधि मन्त्रालयमा सूचीकृत हुन नआउने सामाजिक सञ्जाललाई भदौ १९ बाट बन्द गर्ने निर्णय गरेको छ । भदौ ९ गते बसेको मन्त्रिपरिषद्को बैठकले सामाजिक सञ्जाल कम्पनीलाई मन्त्रालयमा सूचीकरणका लागि एक साता समय दिने निर्णय गरेको थियो ।
मन्त्रिपरिषद्को निर्णयअनुसार सञ्चार मन्त्रालयले भदौ १२ मा एक साताभित्र सूचीकरण नगरे बन्द गर्ने चेतावनी दिएको थियो । त्यस सूचना बमोजिम सामाजिक सञ्जालहरू सूचीकृत नभएपछि भदौ १९ गतेबाट बन्द गर्ने निर्णय कार्यान्वयनतर्फ सरकार अघि बढेको हो ।
सर्वोच्च अदालतले समेत स्वदेशी तथा विदेशी सामाजिक सञ्जाललाई सञ्चालनपूर्व अनिवार्य रूपमा सम्बन्धित साधिकार निकायमा अनिवार्य सूचीकरण गर्न आदेश दिएको सरकारको भनाइ छ ।
