काठमाडौं । सत्तारुढ दलहरूको उच्चस्तरीय राजनीतिक संयन्त्रको बैठक सरकारका विषयमा केन्द्रित भएको छ । प्रधानमन्त्री निवास बालुवाटारमा बसेको बैठकमा सरकारका कामका समीक्षाको विषयबारे छलफल भएको राप्रपा अध्यक्ष, उपप्रधानमन्त्री एवं ऊर्जामन्त्री राजेन्द्र लिङ्देनले जानकारी दिए ।
प्रधानमन्त्री निवास बालुवाटारमा बसेको संयन्त्रको संयोजक भने एमाले अध्यक्ष केपी ओली हुन् ।
मुख्यगरी छलफलको एजेण्डा सरकारले गरिरहेको काम र अब कसरी अगाडि बढ्ने भन्नेमा केन्द्रित भएको उनको भनाइ छ ।
सरकार गठनको ४२ दिनमै रास्वपा सरकारबाट बाहिरिएकोले यस विषययमा पनि बैठकमा कुराकानी भएको बुझिएको छ ।
रास्वपालाई सरकारमा आउन आग्रह गरिएको बुझिएको छ । गठबन्धनलाई थप बलियो बनाउने भनिए पनि गठन भएको एक महिनामै सुदूरपश्चिम सरकार ढलेपछि सत्तारुढ दल थप दबाबमा देखिएका छन् ।
‘संयन्त्रको बैठका सरकारले अहिलेसम्म गरेका कामबारे समीक्षा भयो । र सरकारलाई अझै कसरी प्रभावकारी बनाउने भन्नेमा पनि छलफल गर्यौं,’ लिङ्देनले भने ।
बैठक राष्ट्रपति चुनावमा केन्द्रित नभएको उनले दाबी गरे। राष्ट्रपति पहिले नै छलफल भएको र भागबण्डा टुंगिसकेको भन्दै अहिले छलफल नै आवश्यक नभएको बताएका हुन् ।
१० पुसमा राष्ट्रपति एमालेले लिने समझदारी बनेको संकेत गर्दै यसैलाई मानेर जानुपर्ने संकेत उनले गरेका हुन् । तर प्रधानमन्त्री प्रचण्डले राष्ट्रपतिमा राष्ट्रिय सहमति जुटाउनुपर्ने बताउँदै आएका छन् ।
एमालेले पनि भागबबण्डामा राष्ट्रपति आफूहरूको भएको भन्दै यसमा लफडा गर्न नहुने बताउँदै आएको छ ।
को छन् सहभागी ?
प्रधानमन्त्री पुष्पकमल दाहाल “प्रचण्ड” एमाले अध्यक्ष केपी ओली, रास्वपाका सभापति रवि लामिछाने, राप्रपाका अध्यक्ष राजेन्द्र लिङ्देन बैठकमा सहभागी भएका हुन् ।
बिहीबार नै बैठक बस्ने भनिए पनि प्रधानमन्त्री प्रचण्ड र एमाले अध्यक्ष केपी ओलीबीच भेट भएपछि बैठक शुक्रबार बिहानलाई सारिएको थियो ।
