काठमाडौं । पूर्वउपप्रधानमन्त्री तथा नेकपाका नेता भीम रावलले एक रुपैयाँको नेपाली सिक्काबाट लिम्पियाधुरा, लिपुलेक र कालापानीसहितको चुच्चे नक्सा हटाउने सरकारको निर्णय भएको भन्ने विषयलाई गम्भीर भन्दै आपत्ति जनाएका छन्। आइतबार सामाजिक सञ्जालमार्फत उनले सरकारले असार ३२ गते उक्त नक्सा हटाएर अमेरिकी सहयोगमा बनेको ‘लु भ्याकुर’ गुम्बाको चित्र राख्ने निर्णय गरी नेपाल राष्ट्र बैंकलाई निर्देशन दिएको भन्ने जानकारी सार्वजनिक भएको उल्लेख गरेका छन्।
यदि यस्तो निर्णय वास्तवमै गरिएको हो भने यसलाई नेपालको भौगोलिक अखण्डताविरुद्धको अर्को राष्ट्रघाती कदम मानिने र प्रधानमन्त्रीको हालैको अभिव्यक्तिपछिको थप गम्भीर विषय हुने रावलको भनाइ छ। उनले नेपालको सार्वभौमिकता र राष्ट्रिय हितसँग जोडिएको विषय भएकाले सरकारले तत्काल सत्यतथ्य सार्वजनिक गर्नुपर्ने माग गरेका छन्। साथै, यसबारे राष्ट्रिय स्वतन्त्र पार्टी र नेपाल सरकारले जनतालाई स्पष्ट जानकारी गराएर उत्पन्न अन्योल अन्त्य गर्नुपर्ने उनको आग्रह छ।
