काठमाडौं । कण्डम परिवार नियोजनको प्रभावकारी अस्थायी साधन मात्र नभई एचआईभीसहित विभिन्न यौनजन्य सङ्क्रमण (एसटीआई) बाट जोगाउने भरपर्दो माध्यम पनि हो। यो पुरुषको उत्तेजित लिङ्गमा प्रयोग गरिन्छ र अहिले पुरुष तथा महिला दुवैका लागि कण्डम उपलब्ध छन्। कण्डम सजिलै औषधि पसलमा पाइन्छ भने सरकारी स्वास्थ्य संस्थाबाट निःशुल्क पनि वितरण गरिन्छ। यसमा कुनै हर्मोन नहुने भएकाले शरीरमा हर्मोनसम्बन्धी असर पर्दैन। सहवासका क्रममा वीर्य कण्डमभित्रै रहने भएकाले गर्भधारणको सम्भावना कम हुन्छ र यौनरोग सर्नबाट पनि सुरक्षा मिल्छ।
कण्डमका मुख्य फाइदाहरू
अनिच्छित गर्भधारण हुनबाट बचाउँछ।
एचआईभी तथा अन्य यौनजन्य रोगबाट जोगाउँछ।
सस्तो, सहज र सजिलै उपलब्ध हुन्छ।
प्रयोग गर्न सरल र प्रभावकारी हुन्छ।
सुरक्षित यौन सम्पर्क कायम गर्न सहयोग गर्छ।
प्रयोग गर्दा ध्यान दिनुपर्ने कुरा
एउटा कण्डम एकपटक मात्र प्रयोग गर्ने।
एकैपटक दुईवटा कण्डम प्रयोग नगर्ने।
सहवास सुरु हुनु अघि उत्तेजित लिङ्गमा सही तरिकाले लगाउने।
म्याद गुज्रिएको वा च्यातिएको कण्डम प्रयोग नगर्ने।
प्रयोगपछि सुरक्षित रूपमा फोहोर व्यवस्थापन गर्ने, जस्तै डस्टबिनमा फाल्ने। खुला स्थानमा नफाल्ने।
