काठमाडौं । सरकार बनाउने र गिराउने खेलमा लागे सबै राजनीतिक शक्ति उठ्नै नसक्ने गरी थचारिने चेतावनी दिएका नेकपा संयोजक पुष्पकमल दाहाल ‘प्रचण्ड’ भोलिपल्टै त्यही राजनीतिक समीकरणतर्फ उन्मुख भएका छन्।
साउन ८ गते पुष्पलाल स्मृति दिवसको कार्यक्रममा प्रचण्डले सरकार बनाउने र गिराउने खेल दोहोर्याउन नहुने भन्दै अब ‘गफ होइन, एक्सन’मा जानुपर्ने बताएका थिए। तर उक्त अभिव्यक्ति दिएको २४ घन्टा नबित्दै एमाले अध्यक्ष केपी शर्मा ओलीसँग प्रदेश सरकार गठनबारे सहमति भएको छ।
सहमतिअनुसार कोशी, बागमती र लुम्बिनीमा एमालेको नेतृत्वमा सरकार बन्नेछ भने कर्णाली र सुदूरपश्चिममा नेकपाले नेतृत्व गर्नेछ। गण्डकी र मधेसमा भने अन्य दलको सहयोगमा सरकार गठन गर्ने समझदारी भएको बताइएको छ। प्रचण्डको अभिव्यक्ति र त्यसलगत्तै भएको राजनीतिक सहमतिलाई लिएर अहिले विभिन्न राजनीतिक वृत्तमा चर्चा सुरु भएको छ।
