काठमाडौं : नागढुंगा–सिस्नेखोला सुरुङमार्गको आज औपचारिक उद्घाटन गरिएको छ। पूर्वाधार विकासमन्त्री सुनील लम्साल र जापान अन्तर्राष्ट्रिय सहयोग संस्था (जाइका)का अध्यक्ष डा. तानाका अकिहिले संयुक्त रूपमा सुरुङमार्ग उद्घाटन गरेका हुन्। २०७६ कार्तिक ४ गते तत्कालीन प्रधानमन्त्री केपी शर्मा ओलीले शिलान्यास गरेको यो परियोजनाको उद्घाटनसँगै शिलालेख विवादले पनि चर्चा पाएको छ।
उद्घाटन कार्यक्रममा मन्त्री लम्सालले ओलीको नाम रहेको हराएको शिलालेख खोजी गरी पुनर्स्थापना गर्ने प्रतिबद्धता व्यक्त गर्दै विगतका योगदानलाई सम्मान गरिने बताए। उद्घाटनपछि उनले सुरुङमार्गभित्र गाडी चलाएर निरीक्षणसमेत गरे। कार्यक्रममा जाइकाका अध्यक्ष तानाकाले नागढुंगा–सिस्नेखोला सुरुङमार्ग नेपालको यातायात विकास यात्रामा ऐतिहासिक तथा रूपान्तरणकारी उपलब्धि भएको बताए। उनले यो परियोजनाले नेपाल–जापानबीचको सहकार्यलाई अझ सुदृढ बनाउने विश्वास व्यक्त गरे।
प्रारम्भिक सम्झौताअनुसार ४२ महिनाभित्र सम्पन्न हुनुपर्ने आयोजना कोभिड–१९ महामारी, मुआब्जा विवाद तथा अन्य प्राविधिक चुनौतीका कारण ढिलाइ भएको थियो। अब सुरुङ सञ्चालनमा आएपछि काठमाडौं–नौबिसे सडक खण्डको यात्रा सहज, सुरक्षित र छिटो हुने अपेक्षा गरिएको छ।
