काठमाडौं : नेपालमा टिकटक बन्द गराउने सरकारले निर्णय गरेको छ । आज (सोमबार) बिहान बालुवाटारमा बसेको मन्त्रिपरिषद्को बैठकले सामाजिक सञ्जाल टिकटकलाई बन्द गराउने निर्णय गरेको हो ।
सरकारका प्रवक्ता एवम् सञ्चार तथा सूचना प्रविधि मन्त्री रेखा शर्माले टिकटक बन्द गराउने निर्णय भएको र केही दिनमै कार्यान्वयनमा आउने बताइन् । उनले भनिन्, ‘नेपालमा टीकटक बन्द गर्ने निर्णय भएको छ । मन्त्रिपरिषदको सो निर्णय केही दिनमै कार्यान्वयनमा जान्छ ।’
समाजमा विकृति र विसंगति फैलाउन टिकटकले भूमिका खेलेको ठहर गर्दै सरकारले बन्द नै गर्ने निर्णय गरेको हो । टिकटक बन्द गराउन प्राविधिक रुपमा केही समय लाग्ने बताउँदै मन्त्री शर्माले यसका लागि सरकारले प्रक्रिया अघि बढाइसकेको जानकारी समेत दिइन् ।
विश्वका विभिन्न देशले टिकटकलाई प्रतिबन्ध लगाइसकेका छन् । भारत, अष्ट्रेलिया, क्यानडा, नर्वे, बेल्जियम, न्यूजिल्याण्ड लगायत देशले यसअघि नै टिकटक बन्द गराइसकेका छन् । भारतले सन् २०२० मा टिकटक बन्द गराएको थियो ।
