काठमाडौं : नेपाल प्रहरीको केन्द्रीय अनुसन्धान ब्यूरो सीआईबीले ट्राभल्सको यूजर आइडी सिस्टम नै ह्याक गरी दुई करोड ठगी गर्ने एक जनालाई पक्राउ गरेको छ।
पक्राउ पर्नेमा स्याङ्जाको वालिङ नगरपालिका–४ घर भइ हाल काठमाडौंको टोखा–६ सामाखुसी बस्ने नारायण सुवेदी रहेका छन्। उनी मर्स्याङ्दी ट्राभल्स कम्पनीका म्यानेजरसमेत रहेको सीआईबीले जनाएको छ।
सीआईबीका अनुसार उनले कात्तिक १८ गतेदेखि मंसिर २ गतेसम्म बालुवाटारमा रहेको जियोल्याण्ड ट्राभल्स एण्ड टुर्स प्रालिको यूजर आइडी ह्याक गरी करिब दुई करोड रुपैयाँ ठगी गरेका थिए।
उनले एक करोड ९९ लाख ८२ हजार ९ सय ८५ रुपैयाँ बराबरको हवाई टिकट काटेर यात्रीहरुबाट लिएर जियोल्याण्ड ट्राभल्सलाई ठगी गरेका हुन्। उनले यस्तो टिकट जजिरा र एअर अरेबियाको लागि काटेका थिए। बुधबार पक्राउ परेका उनीमाथि अनुसन्धान भइरहेको सीआईबीले जनाएको छ।
