काठमाडौँ : चिकित्सा शिक्षा र स्वास्थ्य क्षेत्र सुधारका माग राख्दै धनगढीमा २४औँ सत्याग्रहमा बसेका प्रा.डा. गोविन्द केसीको स्वास्थ्य अवस्था जटिल बनेपछि उनलाई सेती प्रादेशिक अस्पतालको आईसीयूमा सारिएको छ। सहयोगी डा. अमृत जैशीका अनुसार केसीको रक्तचाप असन्तुलित हुनुका साथै ब्लड सुगर ५६ बाट घटेर ५० एमजीडिएलमा पुगेको छ। मांसपेशी बाउँडिने, बोल्न, हिँड्न र बाथरुम जानसमेत कठिनाइ भएपछि चिकित्सकको सिफारिसमा आईसीयूमा राखिएको हो। अस्पतालमा सारिए पनि उनले अनशन भने निरन्तर जारी राखेका छन्।
सेती प्रादेशिक अस्पतालका फिजिसियन डा. गजेन्द्र दुवालको नेतृत्वमा उनको उपचार भइरहेको छ। शिक्षामन्त्री सस्मित पोखरेलले फोनमार्फत माग सम्बोधनका लागि पहल गर्ने प्रतिबद्धता जनाउँदै वार्तामा आउन आग्रह गरेका छन्। तर डा. केसीले दशरथचन्द मेडिकल विश्वविद्यालयका पदाधिकारी हटाउने, गेटामा ३०० शैयाको अस्पताल सञ्चालन गर्ने, छात्रवृत्ति कटौती र निजी मेडिकल कलेजमा सिट वृद्धि गर्ने निर्णय खारेज गर्नुपर्ने माग दोहोर्याएका छन्।
