नेपाली महिला यू–१९ क्रिकेट टोलीले एसीसी यू–१९ महिला प्रिमियर कपमा तेस्रो स्थान हासिल गरेको छ। शनिबार भएको तेस्रो स्थानको प्रतिस्पर्धामा नेपालले इन्डोनेसियालाई ९ विकेटले सहज रूपमा पराजित गर्दै प्रतियोगिता सुखद अन्त्य गरेको हो। इन्डोनेसियाले दिएको ६९ रनको सामान्य लक्ष्य नेपालले १४.२ ओभरमै १ विकेटको क्षतिमा पूरा गर्यो।
नेपालको जितमा सना प्रवीण २५ रनमा अविजित रहिन् भने साबित्री धामीले २४ रनको योगदान दिइन्। करुना बिष्ट १६ रनमा अविजित रहँदै टोलीलाई जितसम्म पुर्याइन्। यसअघि टस जितेर पहिले ब्याटिङ गरेको इन्डोनेसियाले निर्धारित २० ओभरमा ९ विकेट गुमाएर ६८ रन बनाएको थियो। इन्डोनेसियाका लागि डेरनी राम्बुले अविजित ३४ रन बनाइन् भने नि पुतु एलिनले ११ रन जोडिन्। अन्य ब्याटरले भने दोहोरो अंकमा रन बनाउन सकेनन्।
नेपालका बलरहरूले उत्कृष्ट प्रदर्शन गरे। मनिषा उपाध्यायले ४ ओभरमा मात्र ७ रन खर्चेर ४ विकेट लिँदै इन्डोनेसियाको इनिङ्स धराशायी बनाइन्। अनु कडायतले २ विकेट हात पारिन् भने तिर्सना बिक, सोनी पाख्रिन र रचना चौधरीले समान १–१ विकेट लिए।
नेपाल यसअघि शुक्रबार भएको सेमिफाइनलमा यूएईसँग सुपर ओभरमा पराजित भएको थियो। प्रतियोगिताको उपाधिका लागि यूएई र थाइल्यान्डबीच शनिबार नै फाइनल खेल हुँदैछ। यद्यपि, नेपालले यसअघि नै यू–१९ महिला एसिया कपका लागि आफ्नो स्थान सुरक्षित गरिसकेको छ, जसले टोलीको आगामी यात्राप्रति थप आशा जगाएको छ।
