संघीय संसद् सचिवालयले आर्थिक वर्ष २०८२/०८३ को सम्पत्ति विवरण तोकिएको समयभित्र अनिवार्य रूपमा बुझाउन सबै संघीय सांसदलाई आग्रह गरेको छ। शुक्रबार सांसद सुविधा व्यवस्थापन शाखाले सूचना जारी गर्दै भ्रष्टाचार निवारण ऐन, २०५९ र अख्तियार दुरुपयोग अनुसन्धान आयोग ऐन, २०४८ अनुसार सम्पत्ति विवरण पेस गर्न निर्देशन दिएको हो।
सूचनाअनुसार सांसदहरूले आर्थिक वर्ष समाप्त भएको ६० दिनभित्र, अर्थात् २०८३ साउन १ गतेदेखि भदौ २९ गतेसम्म आफ्नो तथा परिवारको नाममा रहेको सम्पत्तिको स्रोत र प्रमाणसहित अद्यावधिक विवरण बुझाउनुपर्नेछ। विवरण सिलबन्दी खाममा बुझाउँदा सदस्यको नाम, पद, लिङ्ग, कार्यालय, स्थायी ठेगाना, मोबाइल नम्बर, इमेल तथा प्रतिनिधिसभा सदस्यका हकमा जिल्ला र निर्वाचन क्षेत्र नम्बर तथा राष्ट्रियसभा सदस्यका हकमा निर्वाचित प्रदेश उल्लेख गर्नुपर्नेछ। सचिवालयले सम्पत्ति विवरण फाराम सांसद सुविधा व्यवस्थापन शाखाबाट प्राप्त गर्न सकिने तथा सचिवालयको वेबसाइटबाट पनि डाउनलोड गर्न सकिने जनाएको छ।
