काठमाडौं । दुर्गेश थापा र प्रियंका कार्की अभिनीत चलचित्र ‘मास्टर्नी’ को प्रमोसन गीत ‘ताराबाजी लैलै’ विवादमा परेपछि युट्युबबाट हटाइएको छ। गीत सार्वजनिक भएलगत्तै त्यसमा प्रयोग भएका शब्द र दृश्यले शिक्षक, विशेषगरी महिला शिक्षक तथा शिक्षण पेसाको गरिमामाथि आँच पुर्याएको भन्दै व्यापक आलोचना भएको थियो। गीतले अमर्यादित र सामाजिक संस्कृतिलाई भड्काउने खालको सन्देश दिएको आरोपसहित सम्बन्धित निकायमा निवेदनसमेत परेको थियो।
विवाद बढेपछि कलाकार दुर्गेश थापा र प्रियंका कार्कीले सामाजिक सञ्जालमार्फत छुट्टाछुट्टै विज्ञप्ति जारी गर्दै सार्वजनिक रूपमा क्षमायाचना गरेका छन्। प्रियंकाले कला र मनोरञ्जन प्रस्तुत गर्ने क्रममा समाजका सम्मानित शिक्षक–शिक्षिका तथा शिक्षण पेसाप्रति कुनै पनि प्रकारको अनादर गर्ने उद्देश्य नरहेको स्पष्ट पार्दै अनजानमा भावनामा चोट पुगेको स्वीकार गरेकी छन्। उनले आफू र सम्पूर्ण टिमका तर्फबाट हृदयदेखि नै माफी मागेकी छन्।
यसअघि नेपाल शिक्षक महासंघ र नेपाल राहत शिक्षक राष्ट्रिय समितिले पनि संयुक्त रूपमा विज्ञप्ति जारी गर्दै उक्त गीतले शिक्षक पेसाको गरिमामाथि गम्भीर प्रहार गरेको भन्दै तत्काल हटाउन र आवश्यक सुधार गर्न माग गरेका थिए। बढ्दो विवादपछि अन्ततः गीत युट्युबबाट हटाइएको हो।
