काठमाडौं । भारतीय क्रिकेट नियन्त्रण बोर्ड (बीसीसीआई)ले कप्तान रोहित शर्माले अन्तर्राष्ट्रिय क्रिकेटबाट संन्यास लिने चर्चा पूर्ण रूपमा अस्वीकार गरेको छ। बोर्डका सचिव देवजीत सैकियाले इङ्ग्ल्यान्डविरुद्ध लर्ड्समा हुने तेस्रो एकदिवसीय खेल रोहितको अन्तिम अन्तर्राष्ट्रिय खेल नहुने स्पष्ट पारेका छन्। उनले सञ्चारमाध्यम र सामाजिक सञ्जालमा फैलिएका विभिन्न अड्कलबाजीमा कुनै सत्यता नरहेको बताउँदै रोहितले अझै भारतका लागि अन्तर्राष्ट्रिय क्रिकेट खेल्न जारी राख्ने जानकारी दिए।
यसअघि भारतीय सञ्चारमाध्यमले लर्ड्समा हुने तेस्रो एकदिवसीय खेलपछि रोहितले अन्तर्राष्ट्रिय क्रिकेटबाट बिदा लिन सक्ने दाबी गरेका थिए। केही समाचारमा बीसीसीआईले सन् २०२७ को एकदिवसीय विश्वकपको योजनामा रोहितलाई नराख्ने निर्णय गरिसकेको र उनको स्थानमा यशस्वी जायसवालजस्ता युवा खेलाडीलाई अवसर दिने तयारी रहेको उल्लेख गरिएको थियो। साथै, संन्यास लिने वा छनोटका लागि उपलब्ध रहने भन्ने अन्तिम निर्णय रोहितकै हातमा रहेको दाबी पनि गरिएको थियो।
इङ्ग्ल्यान्ड भ्रमणका क्रममा पहिलो दुई एकदिवसीय खेलमा रोहितले क्रमशः ११ र २६ रन मात्र बनाएपछि उनको भविष्यबारे चर्चा चुलिएको थियो। फिटनेसमा निरन्तर मेहनत गरिरहेका रोहित छनोटकर्ताको सोचप्रति असन्तुष्ट रहेको र बोर्डका केही पदाधिकारीसँग यस विषयमा छलफल गरेको दाबीसमेत गरिएको थियो। तर बीसीसीआईले ती सबै अड्कलबाजीलाई खण्डन गर्दै रोहित शर्माले अन्तर्राष्ट्रिय क्रिकेटलाई निरन्तरता दिने स्पष्ट पारेको छ।
