काठमाडौं । चर्चित गायिका एलिना चौहानले करिब २ करोड रुपैयाँको लगानीमा नयाँ कपडा व्यवसाय सञ्चालनमा ल्याएकी छन्। उनले काठमाडौंमा ‘रमणी’ नामक कपडा पसल उद्घाटन गर्दै औपचारिक रूपमा व्यवसायिक यात्रा सुरु गरेकी हुन्।
नेपाली सांगीतिक क्षेत्रमा सफल गायिकाका रूपमा परिचित एलिनाले अब फेसन र व्यापार क्षेत्रमा पनि आफ्नो उपस्थितिलाई विस्तार गरेकी छन्। ‘रमणी’मा महिलामुखी आधुनिक तथा परम्परागत पहिरन, डिजाइनर ड्रेस र विभिन्न फेसन सामग्री उपलब्ध हुने जनाइएको छ।
एलिनाले गुणस्तरीय, आकर्षक र सबै वर्गका ग्राहकको पहुँचमा रहने कपडा उपलब्ध गराउने उद्देश्यले व्यवसाय सुरु गरेको बताएकी छन्। उद्घाटन कार्यक्रममा कलाकार, सञ्चारकर्मी, शुभेच्छुक तथा आफन्तहरूको उल्लेख्य उपस्थिति रहेको थियो।
संगीतसँगै व्यवसायलाई पनि समान रूपमा अघि बढाउने योजना रहेको एलिनाको भनाइ छ। पछिल्लो समय नेपाली कलाकारहरू अभिनय र संगीतसँगै विभिन्न व्यवसायमा लगानी गर्दै आएका छन्। सोही क्रममा एलिना चौहानले पनि ‘रमणी’मार्फत उद्यमशीलताको नयाँ यात्रा सुरु गरेकी हुन्।
