काठमाडौं । प्रधानमन्त्री बालेन्द्र शाहले पुँजी बजार र धितोपत्र व्यवसायमा देखिएका समस्या समाधान गरी क्षेत्रलाई थप व्यवस्थित बनाउने प्रतिबद्धता व्यक्त गरेका छन्। सोमबार सिंहदरबारमा पुँजी बजारसँग सम्बन्धित निकाय र सरोकारवालासँग भएको छलफलमा उनले व्यवसायीका जायज माग कार्यान्वयनका लागि सम्बन्धित निकायसँग समन्वय गरी आवश्यक कदम चालिने बताए।
प्रधानमन्त्री शाहले समस्या समाधानका लागि नयाँ समिति गठनभन्दा सम्बन्धित निकायहरूले तत्काल काम अघि बढाउनुपर्नेमा जोड दिएका थिए। छलफलमा सहभागी शेयर ब्रोकर तथा पुँजीबजार विज्ञ प्रियराज रेग्मीका अनुसार लगानीकर्ताको मनोबल बढाउने, करसम्बन्धी अस्पष्टता हटाउने, घाटा समायोजनपछि मात्र कर लिने व्यवस्था गर्ने र ब्रोकरमार्फत मार्जिन लेन्डिङ सञ्चालन गर्न आवश्यक नियम बनाउने सुझाव प्रस्तुत गरिएको थियो।
सहभागीहरूले स्टक एक्सचेन्जको पुनर्संरचना, प्रविधिमैत्री प्रणाली विकास, दक्ष जनशक्ति व्यवस्थापन तथा १० कित्ते नीतिको पुनरावलोकन गरी बुक बिल्डिङ प्रक्रियामार्फत आईपीओ जारी गर्ने व्यवस्था मिलाउन पनि सुझाव दिएका थिए।
