काठमाडौं : कीर्तिपुर नगरपालिका–१ ट्याङ्लाफाँटमा आगलागी भएको गाडीभित्रबाट एक पुरुषको शव फेला परेको छ। बा५च ३०३८ नम्बरको गाडीमा आगलागी भएको सूचना प्राप्त भएपछि प्रहरी र दमकलको टोली घटनास्थल पुगेको थियो।
आगो नियन्त्रणमा लिएपछि गाडीभित्र जलेको अवस्थामा एक पुरुषको शव निकालिएको काठमाडौं उपत्यका ट्राफिक प्रहरी कार्यालयका सूचना अधिकारी एसपी नरेशराज सुवेदीले जानकारी दिएका छन्। प्रारम्भिक अनुसन्धानका क्रममा उक्त गाडी नबिल बैंकको नाममा दर्ता रहेको खुलेको प्रहरीले जनाएको छ।
मृतकको पहिचान खुल्न बाँकी रहेको छ भने आगलागीको कारण पनि अझै स्पष्ट हुन सकेको छैन। घटनास्थलबाट आवश्यक प्रमाण संकलन गरिएको प्रहरीले जनाएको छ। शवलाई पोस्टमार्टमका लागि अस्पताल पठाइएको छ। घटनाबारे थप अनुसन्धान भइरहेको प्रहरीले जनाएको छ।
