काठमाडौं । नेपाली कांग्रेसका संस्थापक नेता बीपी कोइरालाको ४४औँ स्मृति दिवसको अवसरमा पार्टीका संस्थापन र संस्थापनइतर पक्षले छुट्टाछुट्टै कार्यक्रम गर्ने भएका छन्। संस्थापन पक्षले युएन पार्कदेखि जावलाखेलसम्म ‘ग्रीन रन’सहित विभिन्न कार्यक्रम आयोजना गर्ने तयारी गरेको छ भने संस्थापनइतर पक्षले कमलादीस्थित प्रज्ञा प्रतिष्ठानमा विशेष भेला आयोजना गर्ने भएको छ। यसले कांग्रेसभित्रको आन्तरिक विवाद अझै समाधान हुन नसकेको संकेत गरेको छ।
विशेष महाधिवेशनमा सहभागी नभएको निवर्तमान सभापति शेरबहादुर देउवा पक्षले चुनदेवीमा सम्पर्क कार्यालय स्थापना गरी समानान्तर गतिविधि अघि बढाउँदै आएको छ। यही रणनीतिअनुसार बीपी स्मृति दिवसमा पनि शक्ति प्रदर्शनस्वरूप छुट्टै कार्यक्रम गर्न लागिएको हो। निवर्तमान प्रवक्ता प्रकाशशरण महतका अनुसार साउन ६ गते मध्याह्न १२:३० बजे प्रज्ञा भवनमा विशेष कार्यक्रम हुनेछ। नेता मीनबहादुर विश्वकर्माले सोही कार्यक्रममा राष्ट्रिय भेलाको मिति समेत तय गरिने जानकारी दिएका छन्।
उता उपसभापति विश्वप्रकाश शर्माले बीपी कोइराला सबै नेपालीका साझा नेता भएकाले जहाँसुकै आयोजना हुने कार्यक्रममा कांग्रेसले नकारात्मक टिप्पणी नगर्ने बताएका छन्। देउवा पक्षले १४औँ महाधिवेशनबाट आएको कार्यसमितिलाई विशेष महाधिवेशनबाट बनेको संरचनासँग समायोजन गरेर १५औँ महाधिवेशनमा जानुपर्ने माग गर्दै आएको छ। तर सभापति गगन थापाले विधानविपरीत हुने माग स्वीकार गर्न नसकिने स्पष्ट पारेका छन्। उपचारका लागि हङकङमा रहेका देउवा कार्यक्रममा सहभागी हुने छैनन्।
