काठमाडौं । सरकारले कर प्रणालीलाई थप प्रभावकारी बनाउन र नागरिकलाई सक्कली बिल लिन प्रोत्साहित गर्ने उद्देश्यले ‘सक्कली बिल लिनुहोस्, लखपति बन्नुहोस्’ अभियान सुरु गरेको छ। यस योजनाअन्तर्गत हरेक दिन एकजना नेपालीलाई लखपति बनाइने व्यवस्था गरिएको छ भने हरेक महिनामा दुईजना विजेताले बम्पर पुरस्कारस्वरूप १०–१० लाख रुपैयाँ प्राप्त गर्नेछन्।
योजनामा सहभागी हुन मूल्य अभिवृद्धि कर (भ्याट) तथा स्थायी लेखा नम्बर (प्यान) मा आबद्ध व्यवसायबाट कम्तीमा १०० रुपैयाँभन्दा बढीको सामान वा सेवा खरिद गरी सक्कली बिल लिनुपर्नेछ। नगद वा अनलाइन जुनसुकै माध्यमबाट गरिएको भुक्तानीको सक्कली बिल नम्बर नै पुरस्कार छनोटको आधार बन्नेछ।
सरकारले सबै नागरिकलाई सामान खरिद, होटल वा रेस्टुरेन्टमा सेवा लिँदा अनिवार्य रूपमा सक्कली बिल लिन आग्रह गरेको छ। यस अभियानले कर प्रणालीलाई पारदर्शी बनाउने, राजस्व चुहावट नियन्त्रण गर्ने र उपभोक्तामा बिल लिने संस्कृतिको विकास गर्ने अपेक्षा गरिएको छ। हालका लागि विजेताको घोषणा हरेक महिनाको १६ गते र महिनाको अन्तिम दिन गरिने जनाइएको छ।
