जनकपुर : जनकपुरधामस्थित जानकी मन्दिर परिसरमा श्रम संस्कृति पार्टीका अध्यक्ष हर्कराज साम्पाङलाई स्वागत गर्न पुगेका नेता तथा कार्यकर्तालाई हिन्दु सम्राट सेनाका कार्यकर्ताले लखेटेका छन्। साम्पाङ मंगलबार मन्दिर दर्शनका लागि जनकपुर आउने कार्यक्रम रहेकाले उनका समर्थकहरू स्वागतका लागि पुगेका थिए। हिन्दु सम्राट सेनाले भने साम्पाङले विगतमा गाई काटेर खानुपर्ने अभिव्यक्ति दिएको आरोप लगाउँदै उनलाई मन्दिर प्रवेशमा निषेध गर्ने चेतावनी दिएको जनाएको छ।
घटनापछि साम्पाङले सामाजिक सञ्जालमार्फत “गाई कसले खाएको रैछ? गाई खानेलाई मन्दिरमा पस्न नदिने भनेको देखें” भन्दै प्रतिक्रिया दिएका छन्। उनले अर्को स्टाटसमा जनकपुरमा तनाव भएको र गृहमन्त्रीको फोन अफ रहेको उल्लेख गर्दै आफ्ना कार्यकर्तालाई संयमित रहन आग्रह गरेका छन्। आज जनकपुरमा श्रम संस्कृति पार्टीको साधारण सभा तथा पार्टी प्रवेश कार्यक्रम पनि आयोजना गरिएको छ। घटनाबारे थप जानकारी आउन बाँकी छ।
