काठमाडौं । पूर्वप्रधानमन्त्री तथा नेपाली कांग्रेसका निवर्तमान सभापति शेरबहादुर देउवाले उपचारपछि स्वदेश फर्कन लागेको जानकारी दिँदै राष्ट्रिय एकता र सहकार्यको आवश्यकता औंल्याएका छन्। सार्वजनिक सन्देशमार्फत उनले अहिले देशलाई प्रतिशोधभन्दा सहकार्य, विभाजनभन्दा एकता र अविश्वासभन्दा विश्वास आवश्यक रहेको बताएका छन्।
देउवाले इतिहासको अनुभव, परिवर्तनको ऊर्जा तथा नयाँ पुस्ताको ज्ञान र सिर्जनशीलतालाई जोड्दै राष्ट्र निर्माणका लागि साझा संवाद र सहकार्य अपरिहार्य भएको उल्लेख गरेका छन्। उनले प्रतिशोध र निषेधको राजनीतिबाट माथि उठेर साझा भविष्य निर्माणमा सबै एकजुट हुनुपर्ने धारणा पनि व्यक्त गरेका छन्।
सन्देशमा उनले सरकार प्रतिशोधात्मक र अलोकतान्त्रिक बन्न सक्ने भए पनि नेपाली जनताको लोकतान्त्रिक चेतना, राष्ट्रप्रेम र न्यायप्रतिको विश्वासप्रति आफू पूर्ण आशावादी रहेको बताएका छन्। देउवा गत फागुनमा उपचारका लागि सिंगापुर गएका थिए भने त्यसपछि थप उपचारका लागि हङकङ पुगेका थिए। अब उनी उपचार पूरा गरी स्वदेश फर्किन लागेका हुन्।
