जनकपुर : जनकपुरधामस्थित जानकी मन्दिरमा श्रम संस्कृति पार्टीसँग आबद्ध कार्यकर्तामाथि दुर्व्यवहार भएको भनिएको घटनापछि पार्टी अध्यक्ष हर्क साम्पाङले सामाजिक सञ्जालमार्फत प्रतिक्रिया दिएका छन्। उनले आफ्ना श्रमदातामाथि भएको अपमानले आफू विचलित नभएको, बरु त्यसलाई सकारात्मक रूपमा लिएको बताएका छन्।
साम्पाङले आफूलाई अपमान गर्नेहरूप्रति पनि धन्यवाद व्यक्त गर्दै हिन्दु धर्म वा सम्पूर्ण हिन्दु समुदायलाई दोष नदिएको स्पष्ट पारे। उनका अनुसार हिन्दु धर्मले कसैलाई अपमान गर्न सिकाउँदैन र जनकपुरस्थित जानकी मन्दिर तथा जानकी माताले आफूलाई अस्वीकार नगरेका हुन्।
उनले घटनामा संलग्न व्यक्तिहरू को हुन् र किन यस्तो भयो भन्ने विषय उचित समयमा सार्वजनिक गर्ने पनि बताएका छन्। गाली, आलोचना र विरोधले आफूलाई कमजोर बनाउने होइन, झन् सशक्त बनाएको उनको भनाइ छ। साम्पाङले देशप्रेम, राष्ट्रप्रेम र श्रम संस्कृतिको अभियान अझ व्यापक रूपमा फैलिने विश्वास व्यक्त गर्दै नकारात्मक घटनालाई सकारात्मक ऊर्जामा रूपान्तरण गर्न सकिने बताएका छन्।
