काठमाडौं । नेपाल राष्ट्र बैंकको तेस्रो त्रैमासिक आर्थिक बुलेटिनअनुसार आर्थिक वर्ष २०८२/८३ मा नेपालको कुल राष्ट्रिय बचत (ग्रस नेसनल सेभिङ) इतिहासकै उच्च जिडिपीको ४४.८ प्रतिशत पुग्ने प्रक्षेपण गरिएको छ। यो वृद्धि मुख्यतः रेमिटेन्सको उच्च प्रवाहका कारण सम्भव भएको हो। गत जेठसम्म नेपालमा २१ खर्ब २० अर्ब रुपैयाँ रेमिटेन्स भित्रिएको छ।
यद्यपि, कुल घरेलु बचत (ग्रस डोमेस्टिक सेभिङ) भने जिडिपीको ९.७ प्रतिशत मा सीमित रहेको छ। यसले देशभित्र उत्पादन, रोजगारी र आय सिर्जनाबाट हुने बचत अझै कमजोर रहेको देखाउँछ। राष्ट्रिय बचत बढ्नु भविष्यका लगानीका लागि सकारात्मक मानिए पनि त्यसको प्रभाव अर्थतन्त्रमा अपेक्षित रूपमा देखिएको छैन। विशेषज्ञहरूले दीर्घकालीन आर्थिक मजबुतीका लागि रेमिटेन्ससँगै उत्पादन र लगानी विस्तारमा जोड दिनुपर्ने बताएका छन्।
