मुक्तक
विपनीमा यादले सताउँछौ
सपनीमा स्पर्शले तताउँछौ
हामी दुईको नाता खोज्दा,
भन, दुनियाँलाई के बताउँछौ?
गजल
एउटा दुइटा मात्रै हैन सयौं मुटु दुखेको छ !
आँखामा भेल, मनमा भक्कानो फुटेको छ !
मैले पुज्ने प्रकृति गर्जिन्छ मेरै देशको छातीमा,
न्यायदाता मान्ने भगवान् खोइ कता लुकेको छ?
गुहार.. शब्दभित्र कत्ति स्वास आत्तिए होला,
अत्याउँदै अझै पनि भुकम्प त्यतै डुलेको छ!
सन्तानको रोदन अनि बिलाप बाआमाको,
छियाछिया धर्तीमा चित्कारको मुस्लो उठेको छ !
आसुँको तालमाथी लुटको डुङ्गा खियाउँदै,
राहतको नाउँ लिदै आघात मर्ममा घुसेको छ!
गोमा भट्टराई (मोरङ्ग)
