काठमाडौं । अष्ट्रेलियाको डार्विनस्थित काजालिस एरेनामा मंगलबार नेपालले उत्कृष्ट प्रदर्शन गर्दै टप एन्ड टी–२० सिरिजमा पहिलो जित हात पारेको छ। नेपालले बिग ब्यास लिगमा खेल्ने क्लब होबार्ट हरिकेन्सलाई ६६ रनले पराजित गर्दै जित दर्ता गरेको हो।
यसअघि नेपाल लगातार तीन खेलमा पराजित भएको थियो। पहिलो खेलमा एनटी स्ट्राइकसँग ४२ रन, दोस्रोमा बंगलादेश ‘ए’सँग ३२ रन र तेस्रो खेलमा मेलबर्न स्टार्ससँग ३१ रनले हार बेहोरेको थियो।
मंगलबारको खेलमा नेपालले टस जितेर पहिला ब्याटिङ गर्दै २० ओभरमा ७ विकेट गुमाएर १८० रनको बलियो योगफल तयार गरेको थियो। नेपालका लागि आरिफ शेखले सर्वाधिक ३३ रन जोडे भने लोकेश बमले केवल ११ बलमा २५ रनको आतिशी प्रदर्शन गरे। ओपनर कुशल भुर्तेलले २७ र आशिफ शेखले २९ रनको योगदान दिए।
जवाफमा होबार्ट हरिकेन्स १६.१ ओभरमै ११४ रनमा अलआउट भयो। विपक्षी टोलीका ब्राडली होप (३१) र चार्ली वाकिम (२८) बाहेक अन्य खेलाडी दोहोरो अंकमा समेत पुग्न संघर्षरत रहे।
बलिङतर्फ नन्दन यादव नेपालका हिरो बने। उनले एक्लैले पाँच विकेट झारे भने कप्तान रोहितकुमार पौडेल, सन्दीप लामिछाने, रिजन ढकाल र कुशल भुर्तेलले एक–एक विकेट हात पारे।
यस जितसँगै नेपाल अंकतालिकामा आठौँ स्थानमा उक्लिएको छ। अब नेपालले बुधबार मेलबर्न रेनेगेड्स र शुक्रबार पाकिस्तान शाहिन्ससँग भिड्ने छ।
