काठमाडौं । राष्ट्रिय स्वतन्त्र पार्टी (रास्वपा)की सांसद आशिका तामाङले आफूलाई जोडेर सार्वजनिक भएका ‘चेक बाउन्स’ सम्बन्धी समाचारप्रति ध्यानाकर्षण भएको जनाउँदै घटनाको वास्तविकता फरक रहेको स्पष्ट पारेकी छन्। सामाजिक सञ्जालमार्फत सोमबार आफ्नो धारणा सार्वजनिक गर्दै उनले आफू चेक बाउन्स प्रकरणको पीडित पक्ष भएको र आफूले कसैलाई दिनुपर्ने रकमको चेक बाउन्स नभएको बताएकी हुन्।
तामाङका अनुसार आफूले प्राप्त गर्नुपर्ने रकमको चेक अनादर (बाउन्स) भएपछि बैंकिङ कानुनअनुसार आवश्यक प्रक्रिया पूरा गरी कानुनी कारबाही अघि बढाइएको हो। उनले यस विषयमा सन् २०२४ मै सामाजिक सञ्जाल र विभिन्न सञ्चारमाध्यमसँगको अन्तर्वार्तामार्फत आफ्नो धारणा सार्वजनिक गरिसकेको पनि उल्लेख गरेकी छन्।
उनले सम्बन्धित व्यक्ति हाल अमेरिकामा रहेको दाबी गर्दै बैंकिङ कानुनअनुसार चेक अनादर सम्बन्धी मुद्दामा बैंकमा ४५ दिनको प्रतीक्षा अवधि पूरा भएपछि मात्र औपचारिक कानुनी प्रक्रिया सुरु हुने व्यवस्था रहेको जानकारी दिइन्।
तामाङले आफूले पाउनुपर्ने रकम नतिर्नका लागि सम्बन्धित पक्षले विभिन्न माध्यमबाट ‘मिडिया ट्रायल’ गर्ने, मानवअधिकार आयोगसम्म पुगेर तथ्यहीन दाबी प्रस्तुत गर्ने प्रयास गरेको आरोप पनि लगाएकी छन्। ती सबै दाबी सत्यतामा आधारित नरहेको उनको भनाइ छ। साथै, आफू र आफ्नो सचिवालयलाई लक्षित गर्दै फैलाइएका भ्रमपूर्ण समाचारमा विश्वास नगर्न आग्रह गर्दै तामाङले वास्तविक तथ्य बुझेर मात्र निष्कर्षमा पुग्न सबैसँग अनुरोध गरेकी छन्।
