यस कारण ट्रायल पास गरेपनि स्मार्ट लाइसेन्स नपाइने


पत्रिका

काठमाडौं, साउन ३१ । धादिङका प्रताप सुवेदीले मोटरसाइकलको लाइसेन्स लिन लिखित र ट्रायल पास गरेको एक महिना बढी बितिसक्यो । तर पनि उनले स्माट कार्ड लाइसेन्स पाउन सकेका छैनन् । बटारस्थित आफ्नो होटल व्यवसाय छाडेर आएको बताउने उनी धादिङबाट काठमाडौं आउजाउ गर्दैमा हैरान भइसकेको बताउँछन् । ‘दुई सातादेखि लाइसेन्स लिन एकान्तकुनास्थित यातायात कार्यालयमा धाइरहेको छु,’ उनले भने, ‘जहिले आउँदा नि कर्मचारीले कार्ड आएकै छैन भनेर फिर्ता पठाउने गरेका छन् ।’

प्रतापजस्तै गोदावरी नगरपालिका १२ का सफल महर्जनले मोटरसाइकलको लाइसेन्स लिन लिखित र ट्रायल पास गरेकै तीन महिना बितिसकेको छ । लाइसेन्स नआउनुको कारणबारेमा कर्मचारीसँग सरोकार राख्दा ‘विभागमा गएर बुझ्न’ भनेर ठाडो जवाफ दिने गरेको उनले सुनाए । ‘स्मार्ट कार्ड वितरण कक्षमा बस्ने कर्मचारीसँग बुझ्दा स्पष्ट जवाफ दिने गरिएको छैन,’ उनले भने । इमाडोलका राजेश बज्रचार्यले त कार्यालयमा गएर बुझ्नै छाडिसकेको बताए । ‘कार्ड आयोरआएन बारेमा बुझ्न घण्टौं लाइनमा बस्नुपर्छ,’ उनले भने, ‘कर्मचारीले कार्यालयमा आएको लाइसेन्सको विवरणसमेत सूचना टाँस्ने गरेको छैन ।’ उनले स्मार्ट कार्ड लाइसेन्सले गर्दा सर्वसाधारणले धेरै दुःख पाइरहेको बताए ।

यी तीन जना प्रतिनिधि भुक्तभोगी मात्र हुन् । उनीहरूजस्तै स्मार्ट कार्ड लाइसेन्सको स्टक सकिँदा दैनिक उपत्यकाका चारैवटा यातायात कार्यालयमा आउने हजारौं सर्वसाधारण त्यसै फर्कन बाध्य छन् । सरकारले स्मार्ट कार्ड ल्याउने बारेमा समयमै निर्णय गर्न नसक्दा यस्तो समस्या आएको हो । पछिल्लो समय नयाँ लाइसेन्सको माग तीव्र र पुरानो नवीकरण अत्यधिक भए पनि थप स्मार्ट कार्ड ल्याउने बारेमा यातायात विभागले कुनै नयाँ निर्णय गर्न सकेको छैन । यातायात मन्त्री वीरबहादुर बलायरले नयाँ स्मार्ट कार्ड खरिद गर्न टेन्डर आहवान गरिसकेको बताए । ‘अहिले ५० हजार कार्डको माग छ,’ उनले भने, ‘यसका साथै आगामी वर्षका लागि पनि टेन्डर आहवान गर्ने तयारी भइरहेको छ ।’

स्मार्ट कार्ड लाइसेन्स एसिलायी विकास बैंक (एडीबी) को सहयोगमा २०७२ मंसिर १४ गतेदेखि वितरण सुरु गरिएको थियो । कागजी लाइसेन्सलाई डिजिटलमा परिवर्तन गर्न मद्रास सेक्युरिटी प्रिन्टर्सले १५ करोड रुपैयाँमा २०६५ मा ठेक्का पाएको थियो । अहिले मुलुकभर दैनिक २ हजार स्मार्ट कार्डको माग छ । सेक्यिुरिटी प्रिन्टर्सले उपलब्ध गराएको १ लाख ६० हजार स्मार्ट कार्ड वितरण भइसकेको छ । यातायात विभागका अनुसार ठेकेदारले २ लाख १० हजार कार्ड दिने सम्झौता भएको थियो । तर सबै आइनसकेको विभागको भनाइ छ ।

स्मार्ट कार्डको स्टक सकिँदा यातायात व्यवस्था कार्यालय मोटरसाइकल बागमती एकान्तकुना ललितपुर, नयाँ खोलिएको तीनवटा लाइसेन्स कार्यालय ठूलो भर्‍याङ, चावहिल र जगातीका कर्मचारी पनि कामविहीन हुने अवस्थामा पुगेका छन् । त्यस्तै नवीकरण सुरु गरिएको गण्डकीबाहेक मेची, कोसी, सगरमाथा, जनकपुर, नारायणी, लुम्बिनी लाइसेन्स कार्यालयमा पनि समस्या उस्तै छ । उपत्यकाका चारैवटा कार्यालयका कर्मचारी यातायात विभागको लापरबाहीले गर्दा सेवाग्राहीलाई समयमै स्माट कार्ड उपलब्ध गराउन नसकेको बताउँछन् ।

यातायात व्यवस्था कार्यालय मोटरसाइकल बागमती एकान्तकुनाका सूचना अधिकारी ईश्वरराज रेग्मीले स्मार्ट कार्ड लाइसेन्स समयमा पठाउन विभागमा बारम्बार जानकारी गराउँदा पनि चासो नदिएको बताए । ‘स्मार्ट कार्ड लाइसेन्स छाप्ने विभागले हो,’ उनले भने, ‘विभागबाट कार्ड नपठाउँदा हामी कर्मचारीसमेत आलोचित हुनुपरेको छ ।’ उनले दैनिक ३र४ सय सेवाग्राही कार्यालयमा झगडा गर्न आउने गरेको बताए ।

कार्डपछि यातायात कार्यालय एकान्तकुनामा सेवाग्राहीले नाराबाजी गर्दै घेराउ गर्दै आएका छन् । उनीहरूले स्टकमा रहेको स्मार्ट कार्ड कहिले सकिनेछ भन्नेबारे जानकारी हुँदा पनि नयाँ कार्ड ल्याउन पहल नगरिएको भन्दै होहल्ला, गालीगलौज र तोडफोडसमेत गरेका छन् । कर्मचारीहरू कार्यालयमा ढिला आउने र तोकिएको समय अवधिसम्म बस्ने गरेका छैनन् । यसले गर्दा बिचौलियाले कर्मचारीलाई घूस खुवाएर काम गरेका हुन् ।

अत्यधिक क्षमता भएको स्मार्ट कार्डको सर्भरमा पटकपटक खराबी आउने गरेकाले कार्यालयको कामकाज ठप्प हुने गरेको पनि सिस्टममा आएको खराबीको नभई स्मार्ट कार्डको स्टक सकिएकाले हो । सिस्टम जानीजानी ‘होल्ड’ गर्नुपर्दा मुलुकभरका यातायात कार्यालयहरूको कामसमेत सीधै प्रभावित हुने गरेको छ आजको कान्तिपुर दैनिकमा समाचार छ ।