काठमाडौं : काठमाडौं उपत्यकामा पछिल्लो २४ घण्टामा ट्राफिक नियम उल्लङ्घन गर्ने ५२१ जना सवारीचालक कारबाहीमा परेका छन्। काठमाडौँ उपत्यका ट्राफिक प्रहरी कार्यालयका प्रवक्ता तथा प्रहरी उपरीक्षक नरेशप्रसाद सुवेदीका अनुसार सबैभन्दा बढी ३२३ जनालाई विभिन्न सवारी नियम उल्लङ्घन गरेको अभियोगमा कारबाही गरिएको हो।
कारबाहीमा परेकामध्ये ३० जना मादकपदार्थ सेवन गरेर सवारी चलाएको, १२ जना यान्त्रिक मापदण्ड उल्लङ्घन गरेको, २६ जना ट्राफिक संकेत बत्ती नमानेको तथा ६६ जना तीव्र गतिमा सवारी चलाएको आरोपमा कारबाहीमा परेका छन्। त्यस्तै, अवस्था ठीक नभएका सवारी चलाएका ७ जना, निषेधित क्षेत्रमा हर्न बजाउने ३२ जना, सडक तथा फुटपाथमा अवैध पार्किङ गर्ने १९ जना र एकतर्फी सडकमा सवारी चलाउने ६ जनालाई पनि कारबाही गरिएको प्रहरीले जनाएको छ।
ट्राफिक प्रहरीले सडक सुरक्षा कायम गर्न नियमित निगरानी र कारबाही अभियानलाई निरन्तरता दिइरहेको जनाएको छ। सवारी नियमको पालना गर्न तथा सुरक्षित र जिम्मेवार ढंगले सवारी सञ्चालन गर्न सबै चालकलाई आग्रह गर्दै नियम उल्लङ्घन गर्ने जो–कोहीलाई कानुनअनुसार कारबाही गरिने चेतावनीसमेत दिएको छ।
