काठमाडौं । राप्रपा संसदीय दलका नेता ज्ञानेन्द्र शाहीले विदेशमा रहेका नेपालीप्रति लक्षित गरी दिएको भनिएको अभिव्यक्तिबारे स्पष्टीकरण दिएका छन्। जापान भ्रमणका क्रममा आफूमाथि आक्रमणको प्रयास भएको दाबी गर्दै प्रतिक्रिया जनाउँदा प्रयोग गरेका शब्दको आलोचना भएपछि उनले सामाजिक सञ्जालमार्फत आफ्नो भनाइ स्पष्ट पारेका हुन्।
शाहीले आफूले विदेशमा रहेका सबै नेपालीलाई नभई केही निश्चित समूहलाई मात्र लक्षित गरेको बताएका छन्। उनका अनुसार टीओबी ग्याङ, गाँजा सेवन गर्ने समूह, सहकारी ठगीमा संलग्न व्यक्ति, डिप्रेसनका रोगी तथा केही अन्धसमर्थकप्रति आफ्नो टिप्पणी केन्द्रित थियो। उनले अरूको चरित्र हत्या गर्ने, अपमानजनक सामग्री बनाएर विवाद सिर्जना गर्दै पैसा कमाउने समूहप्रति आक्रोश व्यक्त गर्दै यस्ता सामग्री परिवारसँग बसेर हेर्न वा सुन्न समेत नसकिने दाबी गरेका छन्।
