काठमाडौं । नेपाल प्रिमियर लिग (एनपिएल) को तेस्रो संस्करणका लागि पोखरा एभेन्जर्सले श्रीलंकाका पूर्वअन्तर्राष्ट्रिय क्रिकेटर अजन्था मेन्डिसलाई मुख्य प्रशिक्षक नियुक्त गरेको छ। पोखराले आगामी सिजनका लागि ४१ वर्षीय मेन्डिससँग सम्झौता गरेको हो। उनी टी–२० विश्वकप विजेता श्रीलंकाली टोलीका सदस्यसमेत हुन्।
अघिल्ला दुई संस्करणमा पोखरा एभेन्जर्सको प्रशिक्षक भारतका राजीव कुमार रहेका थिए। नयाँ सिजनमा टोलीलाई थप प्रतिस्पर्धी बनाउने लक्ष्यसहित क्लबले मेन्डिसलाई प्रशिक्षकको जिम्मेवारी दिएको जनाएको छ।
मेन्डिस अन्तर्राष्ट्रिय क्रिकेटमा रहस्यमय स्पिन बलिङका लागि परिचित खेलाडी हुन्। उनले भारतको इन्डियन प्रिमियर लिग (आईपीएल), पाकिस्तान सुपर लिग (पीएसएल), अस्ट्रेलियाको बिग ब्यास लिग (बीबीएल) तथा वेस्ट इन्डिजको क्यारेबियन प्रिमियर लिग (सीपीएल) जस्ता प्रतिष्ठित फ्रेन्चाइज प्रतियोगितामा पनि सहभागिता जनाएका छन्।
सन् २०२२ यता उनले कुनै औपचारिक प्रतिस्पर्धात्मक खेल खेलेका छैनन्। यद्यपि, उनको अन्तर्राष्ट्रिय अनुभव र विभिन्न टी–२० लिगमा खेलेको अनुभव पोखरा एभेन्जर्सका लागि महत्त्वपूर्ण हुने विश्वास गरिएको छ। मेन्डिसले श्रीलंकाका लागि सन् २०१४ को टी–२० विश्वकप पनि खेलेका थिए। अब उनको नेतृत्वमा पोखरा एभेन्जर्सले एनपिएलको तेस्रो संस्करणमा उत्कृष्ट प्रदर्शन गर्ने अपेक्षा गरिएको छ।
