काठमाडौं । नेकपा एमालेका अध्यक्ष केपी शर्मा ओलीले विदेश जाने नेपाली युवाको संख्या अघिल्लो वर्षभन्दा अहिले बढी भए पनि त्यसबारे कुनै चर्चा नभएको बताएका छन्। आइतबार पार्टी कार्यालय च्यासलमा आयोजित अन्तर्क्रिया कार्यक्रममा उनले गत वर्ष विदेश पलायनको विषयलाई अत्यधिक प्रचार गरिएको तर अहिले संख्या बढ्दा पनि मौनता देखिएको टिप्पणी गरे।
ओलीले विगतमा विदेश जाने विषयलाई अस्वाभाविक रूपमा प्रस्तुत गरिएको दाबी गर्दै अहिले पनि संख्या बढेको भए पनि त्यसबारे चर्चा नभएको बताए। उनका अनुसार केही समूहले जनताको हितभन्दा आफ्नो संकीर्ण स्वार्थका लागि तथ्यलाई बंग्याएर प्रस्तुत गर्ने गरेका छन्। “कुरो र कुलो जता पनि जान्छ” भन्ने उखान उद्धृत गर्दै उनले गलत सूचना सच्याएर सही तथ्य जनतासमक्ष पुर्याउनु आवश्यक रहेको बताए। संसद नै यस्ता भ्रम चिर्ने र सही सूचना प्रवाह गर्ने प्रभावकारी माध्यम भएको उनको भनाइ थियो।
