काठमाडौं । नेपाली शेयर बजार लगातार पाँचौँ कारोबार दिन पनि हरियाली देखिएको छ। सोमबार नेप्से परिसूचक ४१.७० अंकले बढेर २ हजार ७१९.२४ विन्दुमा पुगेको छ। पछिल्ला पाँच कारोबार दिनमा नेप्से कुल १४९ अंकले वृद्धि भएको छ, जसले लगानीकर्ताको उत्साह बढेको देखिन्छ।
आज म्युचल फन्डबाहेक सबै समूहका उपसूचक बढेका छन्। उत्पादन तथा प्रशोधन समूह ३.२१ प्रतिशतले उकालो लाग्दा जलविद्युत् र अन्य समूहमा पनि २.५ प्रतिशतभन्दा बढी वृद्धि भएको छ।
कारोबारमा ३४३ कम्पनी सहभागी हुँदा २३९ कम्पनीको शेयर मूल्य बढेको, ३२ कम्पनीको घटेको र ५ कम्पनीको मूल्य स्थिर रहेको छ। एभरेस्ट कलरको शेयर मूल्य १५ प्रतिशतले बढेर सबैभन्दा बढी लाभ गर्ने कम्पनी बन्यो। यता आत्मनिर्भर लघुवित्त र कर्पोरेट डेभलपमेन्ट बैंकको शेयर मूल्य ६.५ प्रतिशतभन्दा बढीले घटेको छ।
कारोबार रकम पनि बढेको छ। शुक्रबार ४ अर्ब ५७ करोड रुपैयाँको कारोबार भएकोमा आज १ करोड २२ लाख कित्ता शेयर ५ अर्ब ५१ करोड रुपैयाँमा किनबेच भएको छ।
