काठमाडौं । मनसुन सक्रिय भएसँगै देशभर बाढी, पहिरो र डुबानको जोखिम बढेपछि सरकारले स्थानीय तह र जिल्ला समन्वय समितिका कर्मचारीलाई कार्यक्षेत्र नछाड्न निर्देशन दिएको छ। भूमि व्यवस्था, सहकारी, संघीय मामिला तथा सामान्य प्रशासन मन्त्रालयले हाल बिदामा रहेका कर्मचारीलाई समेत बिदा छोट्याएर तत्काल कार्यालयमा हाजिर हुन परिपत्र जारी गरेको हो।
मन्त्रालयका अनुसार विपद् व्यवस्थापन, उद्धार, राहत र समन्वय कार्यलाई प्रभावकारी बनाउन सबै कर्मचारीको भौतिक उपस्थिति अनिवार्य गरिएको छ। विशेष परिस्थितिमा कार्यक्षेत्र छाड्नुपरे सम्बन्धित निकायको पूर्वस्वीकृति लिनुपर्ने व्यवस्था गरिएको छ।
यसका साथै कर्मचारीलाई जिल्ला प्रशासन कार्यालय, सुरक्षा निकाय, प्रदेश तथा संघीय निकायसँग निरन्तर समन्वय गर्दै उद्धार, राहत, क्षतिको विवरण संकलन र आवश्यक सहजीकरणमा सक्रिय रहन निर्देशन दिइएको छ। स्थानीय सरकार विपद्का बेला नागरिकको पहिलो भरोसा भएकाले छिटो, प्रभावकारी र व्यवस्थित सेवा प्रवाह सुनिश्चित गर्न सरकारले यस्तो निर्णय गरेको मन्त्रालयले जनाएको छ।
