काठमाडौं । प्रधानमन्त्री बालेन शाहले निजी क्षेत्रसँगको संवादलाई निरन्तरता दिँदै आज चिया उद्योगी तथा व्यवसायीहरूसँग छलफल गर्ने भएका छन्। प्रधानमन्त्री कार्यालयका अनुसार बिहान ११ बजे हुने भेटवार्तामा नेपाली चिया उद्योगले भोगिरहेका समस्या, उत्पादन वृद्धि, निर्यात प्रवर्द्धन र समाधानका उपायबारे विस्तृत छलफल हुनेछ।
आजको छलफलमा अर्गानिक एसोसिएसन अफ नेपाल, गोर्खा टि–स्टेट, हिमालयन सांग्रिला चिया उद्योग, अन्नपूर्ण अर्गानिक एग्रो इन्डस्ट्रीलगायतका उद्योगका अध्यक्ष तथा प्रतिनिधिहरू सहभागी हुनेछन्।
यसअघि प्रधानमन्त्री शाहले नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स, निर्माण व्यवसायी महासंघ, फुटवेयर एसोसिएसन, सेयर लगानीकर्ता, तयारी पोसाक उद्योग संघ तथा हस्तकला महासंघका प्रतिनिधिहरूसँग पनि छुट्टाछुट्टै छलफल गरिसकेका छन्।
प्रधानमन्त्रीको सचिवालयका अनुसार यी भेटघाटको उद्देश्य निजी क्षेत्रका समस्या प्रत्यक्ष सुन्ने र समाधानका लागि आवश्यक नीति तय गर्नु हो। नेपालको अधिकांश चिया भारत हुँदै तेस्रो मुलुकमा निर्यात हुने भएकाले भारतीय नीति, भन्सार प्रक्रिया र बजार अवस्थाले पार्ने प्रभावबारे पनि आजको छलफलमा विशेष रूपमा विषय उठाइने बताइएको छ।
