काठमाडौं । आईसीसी क्रिकेट विश्वकप लिग–२ अन्तर्गत नेदरल्यान्ड्समा जारी त्रिकोणात्मक शृङ्खलामा नेपालले आज आफ्नो दोस्रो खेल घरेलु टोली नेदरल्यान्ड्ससँग खेल्दैछ। युट्रेक्टमा हुने खेल नेपाली समयअनुसार दिउँसो २:४५ बजे सुरु हुनेछ। यस शृङ्खलामा नेपाल, नेदरल्यान्ड्स र नामिबिया सहभागी छन् भने नेदरल्यान्ड्सको यो पहिलो खेल हुनेछ।
नेपाल पहिलो खेलमा नामिबियासँग ८ विकेटले पराजित भएको थियो। त्यस खेलमा नेपाली शीर्षक्रमका ब्याटरले अपेक्षाअनुसार प्रदर्शन गर्न नसक्दा नेपाल १५७ रनमै अलआउट भएको थियो। लक्ष्य पछ्याएको नामिबियाले सहज रूपमा जित निकालेको थियो।
लिग–२ को शीर्ष चारमा रहने सम्भावना बलियो बनाउन नेपालका लागि आजको खेल निकै महत्वपूर्ण मानिएको छ। लगातार हारले अंक तालिकामा दबाब बढ्ने भएकाले नेपाली टोली जित निकाल्ने लक्ष्यसहित मैदान उत्रिनेछ। कप्तान र प्रशिक्षक दुवैले ब्याटिङमा सुधार गर्दै समग्र प्रदर्शन उकास्नुपर्ने चुनौती रहेको बताएका छन्।
