काठमाडौं । राष्ट्रिय स्वतन्त्र पार्टी (रास्वपा) का सांसद तथा पूर्वमन्त्री बब्लु गुप्ता चलिरहेको मोटरसाइकलमा उभिएर यात्रा गरेको भिडियो सामाजिक सञ्जालमा भाइरल बनेपछि आलोचनामा परेका छन्। सिरहा–१ बाट निर्वाचित गुप्ता भिडियोमा मोटरसाइकलको पछाडि उभिएर मोबाइल चलाइरहेको र हेल्मेटसमेत नलगाएको देखिन्छ। सार्वजनिक पदमा रहेका व्यक्तिले नै ट्राफिक नियम उल्लंघन गर्दै जोखिमपूर्ण यात्रा गरेको भन्दै सामाजिक सञ्जालमा व्यापक आलोचना भइरहेको छ।
धेरैले सांसदजस्ता जिम्मेवार व्यक्तिले नागरिकलाई सकारात्मक सन्देश दिनुपर्ने बताएका छन्। घटनाबारे प्रतिक्रिया दिँदै गुप्ताले ट्राफिक नियम उल्लंघन भएको स्वीकार गरेका छन्। उनले कानुनी कारबाही भोग्न तयार रहेको बताउँदै सम्बन्धित मोटरसाइकललाई जरिवानाका लागि ट्राफिक प्रहरी कार्यालय पठाइसकेको जानकारी दिए। उनका अनुसार उनीहरू एक कार्यक्रमका लागि भसुवातर्फ जाँदै गर्दा उक्त घटना भएको हो। भिडियो भने अहिले पनि सामाजिक सञ्जालमा तीव्र रूपमा शेयर भइरहेको छ।
