काठमाडौं । स्पेनमा अहिले एक सुन्दरी युवतीको निकै चर्चा भइरहेको छ, जसका आकर्षक निला आँखा सबैको ध्यान खिचिरहेका छन्। १९ वर्षीया राजकुमारी लियोनोर बाहिरबाट हेर्दा निकै सरल र मासूम देखिए पनि भविष्यमा सम्पूर्ण स्पेनको नेतृत्व गर्ने जिम्मेवारी उनकै काँधमा आउनेछ। उनी स्पेनकी सिंहासनकी उत्तराधिकारी हुन् र करिब १५० वर्षपछि देशको शासन सम्हाल्ने पहिलो रानी बन्ने तयारीमा रहेकाले अहिले सम्पूर्ण देशको नजर उनीमाथि केन्द्रित छ।
राजकुमारी लियोनोरले तीन वर्ष लामो सैन्य प्रशिक्षण सफलतापूर्वक पूरा गर्दै भविष्यमा देशको रानी तथा सशस्त्र सेनाकी सर्वोच्च कमाण्डर बन्ने दिशामा महत्वपूर्ण उपलब्धि हासिल गरेकी छन्। जुलाई १० मा मर्सियास्थित जनरल एयर एन्ड स्पेस एकेडेमीमा आयोजित समारोहमा उनले १११ जना क्याडेटसँगै अफिसरको पदवी प्राप्त गरिन्। कार्यक्रममा उनकी आमा रानी लेतिसिया, बहिनी इन्फान्टा सोफिया तथा राजा फेलिपे छैटौं उपस्थित थिए। राजा फेलिपेले आफ्नी छोरीलाई ‘ग्रान्ड क्रस अफ एरोनोटिकल मेरिट’ सम्मान प्रदान गरे, जुन सम्मान उनले पनि सन् १९८८ मा यही एकेडेमीबाट प्रशिक्षण पूरा गर्दा पाएका थिए।
लियोनोरले यसअघि सेना र नौसेनाका उच्च सम्मानसमेत प्राप्त गरिसकेकी छन्। उनले करिब ४०० मिटर उचाइबाट दिन र रात दुवै समयमा प्यारासुट जम्प गर्दै आधारभूत तालिम पूरा गरी स्पेनी राजपरिवारको पहिलो आधिकारिक प्याराट्रुपर बन्ने इतिहास रचेकी छन्। आल्मेरियाको भीषण डढेलोका कारण स्नातक समारोहको स्वागत कार्यक्रम भने रद्द गरिएको थियो। अब उनी उच्च शिक्षा र शाही जिम्मेवारीलाई निरन्तरता दिँदै करिब १५० वर्षपछि स्पेनको पहिलो शासन गर्ने रानी बन्ने तयारीमा छिन्।
