काठमाडौं : सरकारले एक रुपैयाँको नयाँ सिक्काको डिजाइन तयार पारेको छ। मन्त्रिपरिषद्बाट स्वीकृत भई अर्थ मन्त्रालयमार्फत उक्त प्रस्ताव नेपाल राष्ट्र बैंक पुगिसकेको छ।नयाँ सिक्कामा नेपालको चुच्चे नक्साका साथै सांस्कृतिक महत्त्व बोकेको आकाश भैरवको चित्र राखिने भएको छ। ६४ योगिनीको प्रतीकका रूपमा सिक्कामा ६४ वटा थोप्ला रहनेछन्।
यसअघि मुस्ताङको घार गुम्बाको तस्वीर राखेर पठाइएको प्रस्तावलाई मन्त्रिपरिषद्ले परिमार्जन गर्न निर्देशनसहित फिर्ता पठाएको थियो।राष्ट्र बैंकका प्रवक्ता गुरुप्रसाद पौडेलका अनुसार नयाँ सिक्काबाट नेपालको नक्सा हटाइने छैन। यद्यपि, सिक्काको तौल, आकार र धातुमा भने परिमार्जन गरिँदैछ। हाल एक रुपैयाँको सिक्का तयार पार्दा त्यसको अंकित मूल्यभन्दा बढी खर्च हुने भएकाले उत्पादन लागत घटाउने लक्ष्य राखिएको छ।
यसका लागि हाल प्रयोग भइरहेको मिश्रित धातु (alloy) को सट्टा शुद्ध स्टिल मात्र प्रयोग गरिनेछ, जसले लागत घटाउनुका साथै वातावरणीय हिसाबले पनि राम्रो मानिन्छ। नेपाल राष्ट्र बैंक ऐनअनुसार सिक्का वा नोटको डिजाइन परिमार्जन वा स्वीकृत गर्दा मन्त्रिपरिषद्को अनिवार्य सहमति आवश्यक पर्छ।
