काठमाडौं । नेपाली कांग्रेसका पूर्वसभापति शेरबहादुर देउवा समूहले सभापति गगन थापासँग पार्टी एकताको सम्भावना लगभग समाप्त भएको निष्कर्ष निकालेको छ। चुनदेवीस्थित सम्पर्क कार्यालयमा इतर पक्षका नेता पूर्णबहादुर खड्काको नेतृत्वमा बसेको शीर्ष नेताहरूको बैठकले अब नयाँ राजनीतिक रणनीति अघि बढाउने संकेत दिएको हो।
बैठकपछि नेता मीनबहादुर विश्वकर्माले बिपी स्मृति दिवसको तयारी, पार्टी एकताका लागि गठित समितिको काम र आगामी राजनीतिक रणनीतिबारे विस्तृत छलफल भएको जानकारी दिए। उनका अनुसार संस्थापन पक्षसँग सहमतिको सम्भावना अब “९९ प्रतिशत” समाप्त भएको निष्कर्षमा नेताहरू पुगेका छन्।
विश्वकर्माले संस्थापन पक्षले वार्ताका लागि कुनै गम्भीर प्रयास नगरेको आरोप लगाए। उनले आफूहरूले पटक–पटक एकताको पहल गरे पनि संस्थापन पक्षबाट आश्वासन मात्रै आएको र व्यवहारमा कुनै प्रगति नभएको दाबी गरे। यही कारण अब नयाँ बाटो रोज्ने निर्णयतर्फ समूह अघि बढेको उनको भनाइ छ।
बैठकले साउन २४ देखि २९ गतेभित्र राष्ट्रिय भेला आयोजना गर्ने तयारी पनि गरेको छ। उक्त भेलामार्फत नेतृत्व, नीति, राजनीतिक सिद्धान्त, संगठनात्मक संरचना, विधान तथा कानुनी व्यवस्थाबारे थप निर्णय गरिने जनाइएको छ। नयाँ पार्टी गठन भए त्यसको नाम, चुनाव चिन्ह र नेतृत्वबारे पनि क्रमशः छलफल गरिने विश्वकर्माले बताए। देउवा समूहले अब वैकल्पिक राजनीतिक यात्राका लागि आवश्यक सम्पूर्ण तयारी अघि बढाउने स्पष्ट संकेत दिएको छ।
