काठमाडौं । पूर्वप्रधानमन्त्री एवं नेपाल कम्युनिस्ट पार्टीका संयोजक पुष्पकमल दाहाल ‘प्रचण्ड’ले नेपालको कम्युनिस्ट आन्दोलन कमजोर बनेको भन्दै त्यसलाई पुनः एकताबद्ध र सशक्त बनाउने समय आएको बताएका छन्। शनिबार पार्टी संस्थापक नेता नरबहादुर कर्माचार्यको १३औँ स्मृति दिवसका अवसरमा पेरिसडाँडास्थित पार्टी केन्द्रीय कार्यालयमा आयोजित कार्यक्रममा बोल्दै उनले देशमा बढ्दो निरंकुश प्रवृत्तिविरुद्ध फेरि एकपटक संघर्षमा उत्रिनुपर्ने आवश्यकता औंल्याए। श्रद्धाञ्जली सभा केवल औपचारिक कार्यक्रम नभई राष्ट्रिय स्वाधीनताको रक्षा र आन्दोलनलाई नयाँ दिशा दिने संकल्प गर्ने अवसर भएको उनले बताए।
प्रचण्डले कम्युनिस्ट आन्दोलनलाई पुनर्जीवित गर्दै पुनः देशको नेतृत्व गर्ने अवस्था सिर्जना गर्नुपर्नेमा जोड दिए। उनले संस्थापक नेता नरबहादुर कर्माचार्यको निष्ठा र योगदानको प्रशंसा गर्दै अन्तिम समयसम्म पनि वामपन्थी आदर्शमा अडिग रहेको स्मरण गरे। साथै, पुष्पलाल र कर्माचार्यजस्ता नेताहरूको योगदानलाई अनुकरण गर्दै विभाजित कम्युनिस्ट शक्तिहरूलाई एकताबद्ध गरी देश र जनताको हितमा अघि बढ्नुपर्ने आवश्यकता रहेको उनको भनाइ थियो।
